Drejtësia italiane vazhdon hetimet për vrasjen e shqiptares Nevila Pjetri pak ditë më parë, po ashtu edhe të transgjinores Camilla, trupat e pajetë të të cilëve u gjetën në harkun kohor të 24 orëve jo shumë larg njëri-tjetrit.
Për të dyja krimet është arrestuar 32-vjeçari Daniele Bedini. Përpos kamerave të sigurisë, gjurmëve dhe gjithçka tjetër, është edhe akuza e shokut të autorit që e fundos përballë drejtësisë. “Erdhi në mes të natës, këmisha e tij ishte e njollosur me gjak, po qante dhe kishte dokumentet e një gruaje” tha ai në dëshminë e tij përpara prokurorit.
Vrasësi i dyshuar i 35-vjeçares me origjinë shqiptare Nevila Pjetri dhe i Carlo Bertolotti, transeksuales Camilla me banim në Albiano Magra, qëndron i paraburgosur në burgun Villa Andreino, në La Spezia. Deri tani ai nuk ka pranuar që të flasë.
