Dëshmitë janë të shumta nga familjarët e Aleksandër Sadikajt, por ende nuk ka asnjë të arrestuar për vrasjen e tij me bombë ditën e shtunë në Tiranë.
E dashura e të riut, ishte ndër të parat që dëshmoi. Ajo tregoi se kishin lënë të konsumonin drekën bashkë, që nuk u realizua kurrë, pasi mori vesh nga televizori lajmin e zi për vdekjen e tij.
“Unë dola për në punë në orën 08:30, ndërsa Aleksandri ishte në gjumë. Ai është zgjuar në orën 10:09 dhe meqë i thashë që do të vonohesha më tha se do të dilte dhe do takoheshim për drekë. Kjo bisedë është bërë në orën 11:00.
Aleksandri nuk ndihej i frikësuar. Rreth orës 14:15 më ka telefonuar shoku i Aleksit dhe më ka pyetur se ku është Aleksi se kishte parë një lajm. Më pas telefonova menaxherin e lokalit dhe e pyeta nëse Aleksi ishte aty.
Ai më tha se nuk dinte gjë. Pas këmbënguljes ai më tha se është djegur një makinë te Tegu, por nuk e dinte nëse ishte ai. U nisa drejt vendngjarjes, por ka pasur shumë trafik.
Më pas fola me kunatin e Aleksit dhe ai më tha që ishte në spital dhe nuk ishte mirë. Kështu që shkova në spital”, thuhet në dëshminë e vajzës.
