Diskutimet midis Turqisë, Finlandës dhe Suedisë për aplikimin e vendeve nordike për t’u anëtarësuar në NATO do të vazhdojnë dhe një samit i aleancës në Madrid javën e ardhshme nuk është një afat përfundimtar, thotë zëdhënësi i presidentit turk, Ibrahim Kalin.
Finlanda dhe Suedia aplikuan për anëtarësim në NATO pasi Rusia nisi një pushtim të plotë të Ukrainës katër muaj më parë.
Por ofertat janë përballur me kundërshtimin e Turqisë, e cila ka akuzuar fqinjët nordikë për sigurimin e një strehë të sigurt për Partinë e jashtëligjshme të Punëtorëve të Kurdistanit (PKK), e listuar si një grup “terrorist” nga Turqia dhe aleatët e saj perëndimorë, si dhe kurdët e tjerë.
Sekretari i Përgjithshëm i NATO-s, Jens Stoltenberg u takua me përfaqësues nga të tre vendet të hënën në përpjekje për të bërë përparim në aplikimet për anëtarësimin e vendeve nordike.
Ai i përshkroi bisedimet si “konstruktive”, por Turqia e bëri të qartë se kishte ende punë për të bërë.
Duke folur me gazetarët në Bruksel pas bisedimeve brenda NATO-s mbi këtë çështje të hënën, Kalin tha se Ankaraja po pret që Suedia, veçanërisht, të ndërmarrë hapa të menjëhershëm lidhur me grupin e armatosur PKK në vendin e saj.
Ai shtoi se çdo përparim në ofertat e anëtarësimit nordik “tash varet nga drejtimi dhe shpejtësia me të cilën këto vende do të ndërmarrin hapa”.
“Samiti i NATO-s në Madrid nuk është afati përfundimtar, kështu që negociatat tona do të vazhdojnë”, u tha Kalin gazetarëve pas bisedimeve.
Ankaraja ka akuzuar Finlandën dhe Suedinë se po ofrojnë një strehë të sigurt për PKK-në, të listuar si një grup “terrorist” nga Turqia dhe aleatët e saj perëndimorë.
Ankaraja ka kërkuar gjithashtu që të dy vendet të heqin ngrirjen e armëve ndaj Turqisë.
Kryeministrja finlandeze Sanna Marin shprehu kohët e fundit frikën se nëse çështjet nuk zgjidhen përpara samitit të NATO-s në Madrid, “ekziston rreziku që situata të ngrijë”.
Gjermania gjithashtu pakësoi shpresat për arritjen e një marrëveshjeje këtë muaj.
