Dita e sotme mund të jetë vendimtare për Shqipërinë dhe Maqedoninë, pasi Sofja mund të heqë veton për Shkupin duke i hapur rrugën edhe Tiranës për negociatat.
Kreu i GERB-it, opozitës bullgare Bojko Borisov, i bëri thirrje kreut të qeverisë Kiril Petkovit që të heqë veton.
Ai deklaroi se do të votonte pro heqjes së vetos, vendim ky i cili do t’i jepte edhe Shqipërisë “dritën jeshile” për integrimin në BE.
Komisioneri i BE për Zgjerim, Oliver Varhelyi e përshëndeti thirrjen e tij duke e cilësuar historike.
“Falënderojmë liderin e opozitës Borisov për marrjen e një vendimi historik për Evropën dhe për pranimin e negociatave me Maqedoninë e Veriut bazuar në propozimin francez që lejon vazhdimin me hapjen e negociatave të anëtarësimit me Maqedoninë e Veriut.
Ne presim që qeveria t’i bëjë propozimet e nevojshme Parlamentit sot në mënyrë që Evropa të mund të ecë përpara”, ka shkruar Varhelyi.
Tashmë vendimi mbetet në dorën e qeverisë bullgare. Edi Rama, bashkë me kryeministrin e Maqedonisë dhe presidentin serb kanë deklaruar se mund të bojkotojnë samitin e BE-së nesër.
