Një Komision i Përbashkët për rishikimin e marrëveshjes së Demarkacionit me Malin zi, është i nevojshëm sipas Albin Kurtit.
“Së bashku me Qeverinë e Malit të Zi duhet të formohet Komisioni i përbashkët për rishikimin e marrëveshjes dhe korrigjimin e gabimeve. Duhet pritur formimi i Komisionit nga Mali i Zi, pastaj të koordinohen aktivitetet në terren, ne në fakt jemi të gatshëm”, tha Kurti në foltoren e Kuvendit.
Kjo përgjigje e kryeministrit erdhi pasi deputeti nga radhët e Aleancës për Ardhmërinë e Kosovës, Shemsedin Dreshaj e ka pyetur Qeverinë nëse e ka një plan për të formuar komisionin e ekspertëve për rishikim të vijës kufitare me Malin e Zi.
Ai gjithashtu theksoi se edhe presidenti i Malit të Zi, Gjukanoviç, ka shprehur gatishmëri për këtë çështje.
“Besoj se edhe qeveria e Malit të Zi do të reflektojë”. Tani duhet të koordinohemi me palën malazeze për aktivitetet e mëtejme, ne do të bisedojmë me ta dhe në momentin e duhur do të veprojmë. Jemi të gatshëm dhe në pritje”.
