Një prej biznesmenëve më të njohur në Shqipëri në fushën e ndërtimit, siç është Anton Gjinaj alias Pashk Rrapi, është transferuar nga Spanja në Shqipëri, për të vuajtur një dënim prej 8 vjet e 9 burgim të dhënë nga drejtësia Spanjolle. Ministri Ulsi Manja ka dhënë pëlqimin për transferimin e bosit të betonit në Tiranë dhe jo vetëm, nga Spanja në Shqipëri.
Dënimi ndaj biznesmenit të njohur që zotëron kompaninë e ndërtimit “Alesio-2014”, fituese e shumë parave publike nga institucionet e shtetërore, është dhënë nga gjykata e Madritit, për trafikimin e gati 50 kg kokainë nga vendet e Amerikës Latinë, në drejtim të Spanjës dhe vende të tjera të europës.
Në dokumentacionin sekret që disponoj rezulton se transferimi i Anton Gjinaj nga Spanja në Shqipëri, është bërë me një procedurë sekrete dhe policia por edhe ministria nuk kanë dhënë asnjë shpjegim se pse dhe cilët kanë qënë arsyet se pse është mbajtur ky operacion kaq sekret. Në një kohë kur policia e shtetit shpërndan njoftime edhe për disa deportime të rëndomta të shqiptarëve që kërkojnë Azil në Gjermani apo në vende të ndryshme të Europës.
Sipas dokumentit, Gjinaj rezulton që në datën 23 qershor 2022, pikërisht në orën 17:35 është marë në dorëzim në aeroportin e Rinasit nga krye/komisari i policisë së Burgjeve, Edmond Levani. Anton Gjinaj me origjinë nga Puka, është person që njihet dhe me emrin Pashuk Gjini. Fillimisht nga Rinasi, ai është transferuar në drejtim të burgut 313 në Tiranë, ku është plotësuar dokumentacioni dhe dosja e tij personale.
Ndërsa vetëm pak ditë më parë Gjinaj është transferuar nga 313 në Tiranë, në drejtim të burgut të Reçit në Shkodër. Pikërisht në këtë burg biznesmeni i ndërtimit duhet të vuajë 8 vjet e 9 muaj burgim, dënim ky që është dhënë fillimisht nga gjykata e Madridit dhe më pas njohur zyrtarisht nga gjykata e Tiranës, në datën 8 Mars 2022.
Pas njohjes së vendimit nga gjykata e Tiranës, rezulton se në datën 2 qershor 2022, ministri i Drejtësisë, Ulsi Manja, ka dhënë pëlqimin dhe miratuar kërkesën e biznesmenit për transferimin e tij nga Spanja në Shqipëri, me qëllim vuajtjen e dënimit në një nga burgjet e vendit.
E gjithë praktika për transferimin e bosit të ndërtimit në Shqipëri është ndjekur nga Ministria e Drejtësisë, Zyra e Marëdhënieve me Jashtë në Prokurorinë e Përgjithshme dhe Drejtoria e Përgjithshme e Burgjeve. Në muajin Prill të vitit 2021 Anton Gjinaj u arrestua nga policia e Malit të Zi, pas një mandate arresti të lëshuar nga zyra e Interpol Madritit, për shkak se Gjinaj ishte implikuar në trafikimin e 50 kg kokainë.
Biznesmeni Shqiptar pas 2 muaj, u ekstradua nga Mali i Zi në Spanjë, shtet në të cilin dhe u dënua me 8 vjet e 9 muaj burgim. Ndërkohë prokuroria e posaçme SPAK, me kërkesë të autoriteteve Spanjolle, ka vendosur të sekuestrojë dhjetëra pasuri që menaxhon dhe zotëron Anton Gjinaj, shkruan gazetari Elton Qyno.
