Në komisionin e Veprimtarisë Prodhuese në Kuvend sot është prezantuar drafti me ndryshimet në Kodin Rrugor. Si rrallë herë PD ka qenë pro. Deputeti Helidon Bushati tha se ky është i vetmi ligj që nuk ka mbrapa një oligark.
“Nuk mund të rri pa theksuar se është një risi ky projektligj, i vetmi që nuk ka pas interesin e një oligarku. Vetëm nëse nuk do të jepni me koncesion policinë rrugore për të marrë përqindje nga gjobat.
Kjo qeveri njihet për bërjen e ligjeve sipas interesit të një oligarku. Kjo është praktika. Por sot u thye, shpresojmë të mos ketë diçka mbrapa kësaj.
Duke iu referuar tre arsyeve madhore, ku kryesorja është siguria rrugore, që lidhet me respektimin e shpejtësisë apo limite për moshat e reja. Nuk kemi asnjë gjë kundër, por kjo nuk na ndalon të konstatojmë atë që po ndodh sot” tha Bushati.
Ai kishte një kritikë. “Sot të fortët dhe djemtë e biznesmenëve apo vetë persona të veshur me pushtet dhe këta janë ato që prekin, ose shkelin më tepër Kodin Rrugor sot”.
Pika kryesore e ndryshimeve lidhet me zgjatjen e afatit të patentës nga 10 në 15 vite.
Ndryshimet e reja parashikojnë dhe një lloj kufizimi për sa i përket drejtuesve të rinj.
Nëse jeni shofer i ri dhe sapo keni marrë patentën, deri në tre vite nuk do të mund të lëvizni në autostradë më shumë se 80 km/h.
Gjithashtu Balla propozoi që të ulet edhe shpejtësia nga 40 km/h në 30 km/h brenda qytetit, pasi sipas tij kjo shpejtësi është shumë e lartë dhe shkaktare për aksidente.
Po ashtu, Balla tha se “sot në Shqipëri ka ardhur momenti që në autostrada të shtohet shpejtësia nga 110 deri në 130 km në orë“.
