Ish-kryebashkiaku i Lushnjës, Fatos Tushe u dënua pasditen e djeshme nga Gjykata Speciale me 2 vite e 4 muaj burg.
Gjithashtu trupa gjykuese e kryesuar nga gjyqtari Erion Bani, ka pranuar kërkesën e SPAK për dënim plotësues për Tushen, duke i hequr të drejtën për të ushtruar funksione publike për 5 vite.
Në pretencë, SPAK fillimisht kishte kërkuar dënimin me 5 vite burg për Tushen. Tushe u akuzua për shpërdorim detyre dhe abuzim me tenderin e një kanali vaditës.
Por në momentin që gjykata e ka deklaruar të pafajshëm për akuzën e shkeljes së barazisë në tendera të pranishmit të sallë filluan të duartrokisnin, por kur u shpall fajtor për akuzën e shpërdorimit të detyrës pati irritim duke sjellë ndërhyrjen e policisë në sallë për të qeësuar situatën.
Ish zv/kryetari i Bashkisë, Gentian Nushi është dënuar me 2 vite e 6 muaj burg, por do të qëndrojë në qeli vetëm për 1 vit e 8 muaj.
Edhe një nga punonjësit e tjerë të bashkisë, Leonard Sefa është dënuar nga GJKKO me 1 vit e 6 muaj burg, ndërsa ai dhe Nushi njëjtë si zyrtarët e tjerë nuk do të mund të kryejnë funksione publike për 5 vite.
