Ushtria Popullore Çlirimtare e Kinës do të dërgojë trupa në Rusi për të marrë pjesë në stërvitjet “Lindje-2022”, të njohura gjithashtu si Vostok-2022, tha të mërkurën Ministria e Mbrojtjes e Kinës.
“Pjesëmarrja e Kinës në stërvitje synon thellimin e bashkëpunimit praktik dhe miqësor me ushtritë e vendeve pjesëmarrëse, rritjen e nivelit të bashkëpunimit strategjik midis palëve pjesëmarrëse dhe forcimin e aftësisë për t’iu përgjigjur kërcënimeve të ndryshme të sigurisë”, tha Ministria e Mbrojtjes. duke shtuar se “është e palidhur me situatën aktuale ndërkombëtare dhe rajonale”.
Stërvitjet do të përfshijnë pjesëmarrje nga India, Bjellorusia, Taxhikistani, Mongolia dhe vende të tjera, sipas ministrisë së mbrojtjes së Kinës, dhe ato do të zhvillohen në fund të gushtit.
Në korrik, Sekretari i Shtetit i SHBA-së, Antony Blinken dhe ministri i jashtëm kinez Wang Yi mbajtën bisedime “të sinqerta” për më shumë se pesë orë dhe Blinken ngriti shqetësime për “përafrimin” e Pekinit me Moskën. Blinken tha se ai nuk mendonte se Kina po sillej në një mënyrë neutrale pasi kishte mbështetur Rusinë në Kombet e Bashkuara dhe “përforconte propagandën ruse”.
Pak përpara se Rusia të fillonte pushtimin e Ukrainës më 24 shkurt, Pekini dhe Moska njoftuan një partneritet “pa kufij”, megjithëse zyrtarët amerikanë thonë se nuk e kanë parë Kinën t’i shmanget sanksioneve të ashpra të udhëhequra nga SHBA ndaj Rusisë ose t’i sigurojë asaj pajisje ushtarake.
