Deputeti i PD-së, Belind Këlliçi gjatë një deklarate për mediat në lidhje me aferën e inceneratorëve është shprehur se drejtësia nuk po vepron.
Ai ka thënë se policia dhe shteti po merren me qytetarë të thjesht dhe kanë lënë në hije vjedhjet e mëdha.
“E. Ç. një 42 vjeçar nga Kukësi, u arrestua në shtator 2015 pasi transportonte disa viça për të cilët nuk kishte faturë tatimore.
Berberi T. H., nga Tirana, po në shtator 2015, u arrestua se nuk lëshonte kupon tatimor pasi qethte klientët.
Në disa qindra raste qytetarët shqiptarë janë arrestuar për ‘mustaqet e Çelos,” ka thënë Këlliçi.
Ai ka shtuar se pas vjedhjes masive grupi i inceneratorëve vazhdon akoma të përfitojë çdo ditë nga 80 mijë euro.
“Po i vodhe shtetit të Rilindjes 10 lekë për një qethje, të hedhin prangat, po përfitove qindra miliona euro nuk të gjen gjë.
Ky është standardi i Edi Ramës së inceneratorëve dhe drejtësisë së reformuar, e cila me polici kap gjithë të mjerët e Shqipërisë, kurse me SPAK nuk kap asgjë.
Nëse doni një shembull, arrogant e flagrant bashkë, keni inceneratorin e Tiranës.
Edhe pse kompania Integrated “Technology Services” ka ‘qethur e rruar’ qindra miliona euro të taksapaguesve shqiptarë. Nuk i ka hyrë gjemb në këmbë. Madje Zoto-Mërtiri-Gugallja shpërblehen për këtë vjedhje me 80 mijë euro në ditë,” ka shtuar ai.
5 pyetjet e PD-së për SPAK
1. Kur burgoset berberi se qethi pa TVSh, po ‘berberët’ që rruajnë miliona dhe sekserët që lëvizin paratë e Edi Ramës, pse nuk preken?
2. Kush po i mbron dhe kush i jep garanci Zotos – Gugalles – Mërtirit?
3. Kush vijon t’u çojë milionat në arrati?
4. Pse kështu, kur dihet që inceneratori, për të cilën janë dhënë paratë, nuk ekziston?
5. A mund të ketë arsye tjetër përveç faktit se ndajnë paratë bashkë?
