Veriu i Kosovës, ka qenë kryefjala e diskutimit mes Gabriel Escobar dhe Ramush Haradinaj.
Haradinaj i cili ishte ftuar në darkën me Escobar në cilësinë e kryetarit të Aleancës për Ardhmërinë e Kosovës, ka bërë të ditur se në takim është diskutuar për gjetjen e një zgjidhjeje rreth zbatimit të sundimit të ligjit në Veri të Kosovës.
“SHBA-të janë aleat dhe mik i besueshëm dhe së bashku do ta ruajmë paqen dhe sigurinë”, ka shkruar Haradinaj në rrjetin e tij social në Facebook pa dhënë shumë detaje për takimin e mbrëmshëm.
Ndryshe Escobar, para se të takohej me tre liderët opozitar, Memli Krasniqin (PDK), Lumir Abdixhikun (LDK) dhe Ramush Haradinajn (AAK), ishte pritur nga Presidentja e Kosovës, Vjosa Osmani në Zyren e Presidentes.
Takimi ka qenë i mbyllur për gazetarë dhe nuk ka pasur konferencë për media pas takimit.
Kamerat janë lënë vetëm në fillim të takimit të marrin pamje.
Temë e takimit, siç është njoftuar, është dialogu në mes të Kosovës dhe Serbisë në Bruksel, veçanërisht situata e fundit në Veri.
Ardhja e Escobar në Kosovë dhe qëndrimi në Bruksel në kohën kur po ndodhte takimi në mes të Kryeministrit të Kosovës, Albin Kurti e Presidentit të Serbisë, Aleksandër Vuçiç, përbën përfshirjen më intensive të SHBA-ve në dialog prejse ka filluar i njëjti para 11 vjetësh.
