Ministrja e Pakistanit për Ndryshimet Klimatike për CNN deklaroi se nga reshjet e forta dhe përmbytjet e kësaj vere në Pakistan, 903 njerëz kanë vdekur teksa vendi po sheh ciklin e tetë të shirave të musonit.
Ajo gjithashtu postoi në Twitter se në mesin e të vdekurve janë 326 fëmijë. Qeveria po përdor të gjitha burimet në dispozicion për të ndihmuar viktimat, tha ajo.
Më shumë se 504 mijë bagëti janë vrarë, pothuajse të gjitha në Balochistan, ndërsa rreth 3 mijë kilometra rrugë dhe 129 ura janë dëmtuar, duke bllokuar hyrjen në zonat e prekura nga përmbytjet, shkruan OCHA.
Të mërkurën, Autoriteti Kombëtar i Menaxhimit të Fatkeqësive (NDMA) tha se nevojiteshin më shumë fonde ndërkombëtare për lehtësimin e përmbytjeve.
“Njerëzit janë të humbur, bagëtitë dhe të korrat janë dëmtuar”, tha Rehman.
Priten më shumë shira të dendur dhe përmbytje, dhe shkollat në Balochistan dhe Sindh janë mbyllur në pritje të një periudhe të re shiu muson që pritet në fund të javës.
Kina tha të mërkurën se do të ofrojë ndihmë urgjente humanitare për Pakistanin, sipas një postimi në Twitter nga Ambasada Kineze në Pakistan.
Sipas deklaratës, furnizimet do të përfshijnë 25 mijë tenda së bashku me 300 mijë dollarë para urgjente për të ndihmuar rajonet e goditura nga përmbytjet në Pakistan.
Pakistani ka shira musonesh çdo vit, por asgjë nuk ka qenë aq e keqe sa shirat këtë verë, tha Rehman për CNN.
Korriku ishte një ndër muajt më të lagësht në tre dekada, me 133% më shumë shi se mesatarja për 30 vitet e fundit, raportoi Autoriteti Kombëtar i Menaxhimit të Fatkeqësive.
Balochistani, i cili kufizohet me Iranin dhe Afganistanin, mori 305% më shumë shi se mesatarja vjetore, tha agjencia e fatkeqësive.
