Në 4 shkurt të këtij viti Saimir Tahiri me pranga në duar nga salla e gjyqit u dërgua në qeli për të vuajtur 3.4 vite burg për shpërdorim detyre.
Por dy muaj më pas, ish-ministri iu drejtua Gjykatës së Lartë për të rrëzuar vendimin. Dy ishin argumentet.
E para se për shkak të funksionit që kishte mbajtur i rrezikohej jeta në burg dhe se familjarët e tij ishin të ekspozuar ndaj eksponentëve të botës së krimit.
Por gjykata e Lartë e rrëzoi. Në vendimin e Gjykatës së Lartë, Kolegji Penal i përbërë nga gjyqtarët Ilir Panda, Medi Bici e Sandër Simoni deklaroi se pretendimet janë të pabazuara.
“Nuk rezulton që të ketë asnjë indice që kërkuesi të mund të bëhet objekt i personazheve të krimit që ndodhen duke kryer dënimin.
Gjithashtu nuk ka asnjë indice që vuajtja e menjëhershme e dënimit me burgim e të dënuarit Saimir Tahiri, mund të sjellë pasoja të rënda për vetë të dënuarin, si dhe për familjen e tij” thuhet në vendimin e zbardhur.
