Një grup shtetesh të Gjirit Persik e kanë kërcënuar Netflix-in me veprime ligjore nëse vazhdon të transmetojë përmbajtje që “kundërshtojnë” Islamin.
“Platforma u kontaktua për të hequr këtë përmbajtje, duke përfshirë përmbajtjen e drejtuar për fëmijët”, thuhet në deklaratë.
Autoritetet rajonale “do të ndjekin pajtueshmërinë e platformës me direktivat dhe në rast se përmbajtja cenuese vazhdon të transmetohet, do të merren masat e nevojshme ligjore”.
Këshilli i Bashkëpunimit të Gjirit përfshin Bahreinin, Kuvajtin, Omanin, Katarin, Arabinë Saudite dhe Emiratet e Bashkuara Arabe.
Nuk pati asnjë reagim të menjëhershëm nga Netflix.
Ndërsa GCC nuk e identifikoi në mënyrë specifike përmbajtjen e konsideruar fyese, një segment në kanalin shtetëror saudit të lajmeve Al-Ekhbariya dënoi “filma dhe seriale për fëmijë me skena që promovojnë homoseksualitetin nën një kopertinë dramatike përmes Netflix”.
Një avokat tha në një intervistë në transmetim se këto ishin “klipe shumë fatkeqe dhe të dhimbshme për fëmijët tanë, nipërit dhe brezin e ardhshëm”.
Një segment i veçantë, gjithashtu në Al-Ekhbariya, tregoi klipe nga shfaqja e animuar “Jurassic World Camp Cretaceous” në të cilën dy personazhe femra puthen, megjithëse kanali ua turbullonte fytyrat.
Vendet e Gjirit janë përplasur në mënyrë të përsëritur me shpërndarësit e filmave amerikanë për përmbajtjen e lidhur me pakicat seksuale, veçanërisht në filma.
Emiratet e Bashkuara Arabe në qershor ndaluan filmin e animuar të Disney Lightyear i cili përmban një puthje të dy lezbikeve.
