Fitorja e koalicionit të djathtë në Itali që pritet që të çojë Georgia Melonin në krye të qeverisë është pritur me entuziazëm edhe në Shqipëri.
Drejtuesit e opozitës, nga Sali Berisha te Ilir Meta dhe eksponentë të tjerë shohin një erë ndryshimi që po vjen përtej Adriatikut.
“Në Itali, fituan Georgia Meloni, Mateo Salvini, Silvio Berluskoni, aleatët tanë tradicionalë.
Sot, Italia është në një moment historik. Meloni, sipas votës së qytetarëve italianë, do jetë kryeministrja reformatore e ardhshme e Italisë.
Fitorja e zonjës Meloni dhe koalicionit që ajo udhëhoqi, është fitore e vlerave konservatore më të arrira të shoqërive të lira, fitore e lirisë, familjes, atdhetarisë dhe atdheut.
Meloni është një euro-atlantiste e vendosur. Ajo ka përkrahur plotësisht qëndresën e kombit ukrainas për liri, dënuar agresionin barbar rus ndaj Ukrainës, ka qëndruar në anën e NATO dhe SHBA në këtë betejë.
Georgia Meloni pa diskutim ka një begraund dhe vokacion të qartë europeist, në favor të BE-së. Natyrisht, vlerat në të cilat ajo beson, janë vlera që gjithnjë e më shumë po triumfojnë në Europë” tha Berisha.
“Italia foli qartë! Urimet më të mira Georgia Melonit për fitoren bindëse së bashku në koalicionin e qendrës së djathtës me Matteo Salvini dhe Silvio Berlusconi.
Duke i uruar shumë suksese qeverisjes së re të Italisë mike dhe partnere të rëndësishme strategjike, jemi të vendosur për forcimin e mëtejshëm dhe të gjithanshëm të marrëdhënieve mes dy vende dhe popujve tanë” ishte mesazhi i Ilir Metës.
Sekretari i përgjithshëm i PD-së, Flamur Noka thotë se tashmë po fryjnë erëra të djathta.
“Fryjnë erëra të djathta. Giorgia Meloni do të jetë kryeministrja e parë grua e Italisë. Urime fqinjëve tanë perëndimorë! Një moment historik në zemër të civilizimit europian” shprehet deputeti demokrat.
