Një aksident i rëndë ka ndodhur mbrëmjen e sotme në aksin rrugor Lezhë-Milot. Mësohet se dy automjete janë përplasur me njëra-tjetrën në afërsi të Milotit.
Nga informacionet e para, një vajzë ka mbetur e plagosur rëndë, e cila është dërguar me urgjencë drejt Spitalit të Traumës në Tiranë.
Sipas Policisë, rreth orës 21:20, në Fushë Milot, shtetasi H.T., 39 vjeç, ka humbur kontrollin mbi drejtimin e mjetit të tij tip “Ford” me të cilin po lëvizte, duke u përplasur me trafikndarësen e rrugës.
Si pasojë e përplasjes me trafikndarësen, nga mjeti tip” Ford” janë shkëputur disa pjesë të tij, që kanë rënë mbi mjetin tip ” Audi” që po lëvizte në këtë aks rrugor, me drejtuese shtetasen K.D., e cila ka marrë dëmtime dhe është dërguar në spital.
Policia ndodhet në vendngjarje dhe ka nisur punën për zbardhjen e plotë të aksidentit.
