Presidenti Vladimir Putin ka emëruar gjeneralin Sergey Surovikin për të udhëhequr përpjekjet e luftës në Ukrainë mes një sërë pengesash ushtarake dhe pakënaqësisë në rritje në Rusi për pushtimin e fqinjit të saj.
Sipas Al Jazeera, emërimi të shtunën vjen pas shkarkimit të dy komandantëve të lartë ushtarakë rusë pasi Kievi ka rifituar territoret e humbura ndaj Rusisë në verilindje dhe jug të Ukrainës.
Emërimi vjen gjithashtu pasi Moska ka pësuar një goditje të madhe pas shkatërrimit të pjesshëm të urës së Kerçit një lidhje kyçe midis Rusisë dhe Krimesë, të cilën Rusia e aneksoi në vitin 2014.
Por kush është Surovikin?
Gjenerali, i lindur në vitin 1966 në qytetin siberian të Novosibirsk, u shpall si kreu i grupit ushtarak jugor të Rusisë në luftën e tij kundër Ukrainës në qershor.
Ai mori titullin Hero i Rusisë dhe u nderua me një medalje për shërbimin e tij në Siri në vitin 2017, ku drejtoi ekspeditën ushtarake ruse si komandant i Forcave Ajrore.
Ai është i njohur për të qenë krejtësisht “i pamëshirshëm” në ushtrinë ruse, sipas një raporti (PDF) nga Fondacioni Jamestoën, një institut kërkimor për politikën e mbrojtjes amerikane.
