Futbolli shqiptar mori një tjetër goditje në fundjavë. Në Delvinë tifozët plagosën me sende të forta kryesorin e sfidës kundër Elbasanit. Në minutën e 50 të takimit, xhaketa e zezë Xhulio Agolli u shënjestrua me sende të forta gjatë një kontestimi të ashpër për një 11-metërsh që vendasit e kërkuan gjatë.
Episodi ku një lojtar vendas u rrëzua në zonën e Elbasanit, u bë shkas që lojtarët të rrethonin arbitrin ndërsa ai u godit në kokë. Ai u dërgua menjëherë në spital për të marrë ndihmën mjekësore ndërsa sfida nuk rifilloi më dhe në këtë mënyrë, AF Elbasani pritet ta fitojë 3-0 në tavolinë ndeshjen.
Në lidhje me ngjarjen policia ka arrestuar Tritan Pipikon, 50-vjeç, ish-futbollist i Delvinës, pasi nga lartësia e një pallati afër stadiumit, ka hedhur sende të forta (gurë), në fushë duke dëmtuar arbitrin e ndeshjes.
