Kryetari i LDK-së, Lumir Abdixhiku, ka reaguar pas dhunës së ushtruar ndaj të moshuarës në Pejë nga një infermiere.
Ai tha se është shokuar nga pamjet që u publikuan, derisa tha se dhuna është problemi shoqëror.
“I shokuar e tronditur nga dhuna e ushtruar ndaj një zonje të moshuar. Edhe më shumë nga indiferenca e vëzhgueseve të kësaj dhune. Pafuqia e asaj zonje, thirrjet e saj që s’kish kush t’i dëgjonte aty, duhet të shërbejnë si zë zgjimi për çdo institucion shtetëror sot”, ka shkruar Abdixhiku.
Kreu i LDK-së tha se ngjarjet si këto nxjerrin anën më të errët të shoqërisë kosovare.
“Ato përveç se të këpusin emocionalisht, të dërmojnë me realitetin e hidhur tek i cili jo rrallëherë po përfundojmë. Kapërcimi nga një shoqëri që respektonte më të vjetrin, në një që ushtron dhunë ndaj tyre në tallje e përqeshje – është përfundim i trishtë. Dhuna është problemi ynë shoqëror dhe kundër saj duhet dhe do të ngritemi të gjithë”.
