Emigracioni i paligjshëm ka futur qeverinë shqiptare të drejtuar nga Edi Rama në një kurs të fortë përplasje me Britaninë e Madhe pas deklaratave të ministres së Brendshme Suella Braveman që ngriti alarmin për fluksin e shqiptarëve në muajt e fundit që po kalojnë kanalin e La Manshit me gomone.
Shkëmbimet në distancë kanë qenë disa sot si të kryeministrit Rama nga Berlini ku ndodhet, por edhe ministrave dhe zyrës së komunikimit të kryeministrit britanik, Sunak.
“5pyetjet.al” kontaktoi me telefon zotin Qirjako Qirko, që është ambasador i Shqipërisë në Britaninë e Madhe lidhur me situatën që nuk është aspak e qetë. Ai nuk pranoi që të komentonte nëse ka pasur kontakte me autoritetet britanike pas deklaratave të kryeministrit Edi Rama, por theksoi se në interes të vendit po bëhet më e mira.
“Nuk ka asgjë për të përjetuar në këtë mes. Ne bëjmë punën tonë. Padyshim puna e ambasadës nuk është për t’u bërë publike në media. Bëjmë më të mirën në këtë drejtim gjithmonë në interes të vendit dhe të komunitetit që kemi këtu dhe në Shqipëri” tha ai për “5pyetjet.al”.
Në muajt e fundit, mediat britanike e kanë kthyer në kryefjalë çështjen e emigracionit të shqiptarëve, por termi “pushtim” që përdori ministrja e Brendshme ishte vija e kuqe.
Kryeministri Edi Rama përmes BBC kishte një mesazh drejtuar Braverman, ku theksoi se në pamundësi për ta toleruar, termi “pushtim” i përdorur nga sekretarja e Brendshme britanike ishte “i çmendur”.
Rama nuk nguroi të shtojë se ndihet i neveritur nga kjo politikë që është e dënuar të dështojë. Kreu i qeverisë e cilësoi si sjellje që ushqen ksenofobi dhe se problemi nuk është i shqiptarëve që emigrojnë por i politikës së brendshme britanike, e cila sipas tij është e dështuar.
U nxehën gjakrat, Londra tërhiqet pas sulmit të Ramës? Sunak: Ju jemi mirënjohës
