Zbardhen detaje të reja nga lirimi nga burgu i Dritan Rexhepit, të njohur me disa nofka në Ekuador, por edhe Shqipëri, Itali, Belgjikë dhe vende të tjera ku kërkohet.
Një tjetër media ekuadoriane shkruan se “Cari i kokainës” ka gjashtë identitete të ndryshme, por emri i tij i vërtetë është Dritan Rexhepi.
Ai u arrestua në qershor 2014 në Guayaquil të Ekuadorit, në një operacion që Policia e quajti “Ballkan”. Por drejtësia ekuadoriane i dha lirinë në nëntor 2021 dhe askush nuk e pa më.
“Po sillet mirë”! Kush ia hapi derën e burgut “mbretit” shqiptar të kokainës?
42-vjeçari shqiptar ishte kreu i një organizate kriminale në të cilën ishin përfshirë shqiptarë të tjerë, të cilët në bashkëpunim me ekuadorianët ishin të dedikuar për kontaminimin e kontejnerëve me drogë në portet e Guayaquil, me destinacion Evropën.
Dritani përdorte edhe emrat Lulezim Murataj, Rexhepaj Gramoz, Rexhepai Dritan, Ioannis Dionysopoulos dhe Edmir Kraja. Në vitin 2015 ai u dënua me 13 vjet burg për trafik droge, për të cilin u dërgua në burgun e Guayaquil dhe më pas në burgun Cotopaxi.
Rexhepi konsiderohet shumë i rrezikshëm në Evropë, ku njihet si “Mbreti i arratisjeve” pasi është arratisur nga tre burgje në Shqipëri, Itali dhe Belgjikë. Dhe qeveria belge arriti ta ekstradonte nga Spanja për të vuajtur një dënim pesëvjeçar për grabitje me dhunë.
Argumenti mbrojtës i shqiptarit është se ai ka lupus, një sëmundje autoimune, e cila mund të prekë kyçet, lëkurën dhe disa organe. Në seancë ai tha se gjendja e tij ishte e komplikuar për shkak të mungesës së kujdesit mjekësor dhe trajtimit të nevojshëm. Gjyqtari e liroi me kusht, por Rexhepi u arratis.
