Kuvendi ka nisur me debate në seancën e sotme dhe grupi i Sali Berishës ka bllokuar foltoren duke sjellë ndërprerjen për disa minuta.
Shkak ishte koha e diskutimit për çështjen e integrimit. Grupi i Sali Berishës nuk pranoi kohën që u ishte vendosur në dispozicion, vetëm 2 minuta secili për të folur duke e kundërshtuar. Në fund me Berishën në krye, bllokuan foltoren dhe Felaj ndërpreu seancën.
Si nisi debati?
Mocioni për çështjen e integrimit ishte iniciuar nga Enkelejd Alibeaj, kryetar i grupit të PD-së. Por Spaho akuzoi PS-në dhe Enkelejd Alibeajn se kanë lënë jashtë listës së personave që do të flasin.
“Mua nuk më përfaqëson as Alibeu, as Tabaku dhe as Taulant Balla. Pse ma hiqni të drejtën për të folur. Unë jam deputet i pavarur, kam të drejtë të flas 10 minuta. prandaj më fusni në listë, se dua të flas për integrimin, sepse është e lidhur edhe me korrupsionin tuaj. Por unë e di që nuk jam listë, sepse ju jeni bedelat, e atij që vjen te karrigia kryesore. Sepse ju jeni pa “din e iman”.
Dhe e di që nuk na lejoni që të flasim. Qëllimi juaj është të mos na lejoni të flasim. Dhe kur ne kërcojmë të drejtën e fjalës kërceni sikur u ka pickuar si miza e kalit. Si ju, janë edhe disa nga krahu jonë, jeni turpi i shqiptarëve dhe e keni përdhosur këtë parlament” tha ajo.
Drejtuesja e seancës, Ermonela Felaj i tha Spahos, se ai së bashku me Berishën, Nokën, Baçin dhe pjesën tjetër të grupit të ish-kryeministrit e kanë emrin në listë. Por fakti që kishin vetëm dy minuta i irritoi dhe bllokuan foltoren. Alibeaj kishte një kërkesë për deputetët e grupit të Berishës. “Kushdo që përdor këtu fjalë të lidhur me Ramën, të shitur te Rama, t’i tërheqin sepse është turpi i tyre” tha ai.
