Në emisionin ‘5 Pyetjet’ nga gazetari Ilir Babaramo në ‘Report Tv’ mbrëmjen e sotme ishin ish-prokurori Eugen Beci dhe gazetari i kronikës së zezë, Sokol Bregu.
Tema e diskutimit kishte të bënte me trafikun e drogës në vendin tonë dhe kthimin e Shqipërisë në një nyje të këtij trafiku.
Ish-prokurori Beci deklaroi se deri më sot në Shqipëri nuk është prodhuar ende asnjë drogë nga e para. Sipas tij, ato që janë zbuluar, referuar këtu edhe laboratorit të Frakullit në Fier, janë thjesht punishte që trafikantët i përdorin për të ekstraduar lëndën narkotike.
Duke e krahasuar rolin e shqiptarëve me pozicionet ushtarake, z. Beci tha se, nëse deri dje shqiptarët kanë qenë thjesht ushtarë, sot ata janë bërë ‘gjeneralë’ të trafikut të drogës, duke bërë që bandat shqiptare të jenë konkurrente të denja të organizatave më të fuqishme ndërkombëtare të drogës.
