Një rrjet ndërkombëtar i kriptomonedhave ka mashtruar më shumë se 200,000 viktima në Evropë, shumica prej tyre në Gjermani, Itali dhe Spanjë.
Policia spanjolle përgjoi tre milionë emaile që u mundësuan hetuesve të identifikonin dhe lidhnin më shumë se 470 faqe interneti të mbështetura nga qendrat e thirrjeve, platformat teknologjike dhe bizneset.
Nga analiza e të gjitha emaileve që përfundojnë me domenin e nivelit të lartë për Spanjën, policia vlerëson se mund të ketë të paktën 17,000 viktima të mundshme vetëm në atë vend.
Ky numër nuk përfshin njerëzit me email që mbarojnë me .com, të cilët mund të jenë mashtruar nga një rrjet global që po ndryshon vazhdimisht formë dhe po rishpik veten. Sipas burimeve policore, kriminelët kanë grumbulluar 2.4 miliardë euro nga qindra mijëra viktima në mbarë botën.
Eurojust po koordinon hetimin e paprecedentë me shtatë vende evropiane që së fundi kryen bastisje të njëkohshme në qendrat e thirrjeve në Shqipëri, Gjeorgji, Maqedoninë e Veriut, Bullgari dhe Ukrainë.
Autoritetet spanjolle morën pjesë në operacionin që u zhvillua në vendin tonë, burimi kryesor i mashtrimeve rreth marketingut në gadishullin Iberik. Një urdhër-arresti është lëshuar për Amant J., një pronar call-center me lidhje të ngushta me qeverinë shqiptare, i cili është edhe këshilltar i Ministrisë së saj të Mbrojtjes.
E denoncoi Berisha për Bitcoin, media: Në kërkim njeriu i lidhur me qeverinë shqiptare
“Këto organizata u krijuan fillimisht në Izrael dhe Evropën Lindore. Pak nga pak, ata filluan të lidhen me njëri-tjetrin dhe u rritën”, tha Mauro Jordan, një avokat që përfaqëson rreth 20 persona në çështjen ligjore që shkaktoi hetimin në Katalonjë.
Klientët e tij përfshijnë një grua 80-vjeçare, e cila humbi më shumë se 800,000 € duke investuar në kriptovaluta të ruajtura në kuletat dixhitale që ajo kurrë nuk ishte në gjendje t’i qasej.
“Këto organizata shumë të mëdha dhe të lidhura ngushtë po krijojnë dhe fshijnë vazhdimisht faqe interneti, dhe po hapin dhe mbyllin kompani,” tha Jordan./El Pais
