Sot në Durrës nisi shitja e apartamenteve të porti i ri i jahteve. “5pyetjet.al” kontaktoi zyrën e shitjeve duke u kamufluar si klient i interesuar për të mësuar më shumë.
Njëri prej operatorëve të qendrës së kontaktit të kompanisë “Eagle Hills Yachts & Marina” u shpreh se sot nisi procesi i shitjeve të apartamenteve, por në terren nuk është vendosur ende asnjë tullë.
Madje, ajo që është më e rëndë dhe e pohuar nga vetë operatori i firmës është fakti që nuk ka leje ndërtimi. “Brenda pak javësh do të marrim lejen e ndërtimit” tha ai, por shtoi se “çdo gjë është e sigurt dhe do të merret.
Shitjet kanë filluar për apartamentet 1+1, 2+1 dhe 3+1. Këtu sot ka shumë njerëz në radhë që po presin” u shpreh ai. Durrës Yachts & Marina 08008808 është numri i kontaktit të vendosur në baner që njofton nisjen e shitjeve të apartamenteve dhe ambienteve të biznesit.
Mbi 2 miliardë euro investim është trumbetuar nga qeveria në portin e ri të jahteve, por opozita akuzon se gjithçka është aferë e pastër e ambalazhuar me emrin e biznesmenit arab Alabar, firma e të cilit ka vetëm 40% të aksioneve dhe 60% nuk dihet se kush i ka, pasi janë regjistruar në parajsat fiskale, offshore.
Opozita ka paralajmëruar se do ta dërgojë çështjen në Gjykatën Kushtetuese, ndërkohë që shitjet vazhdojnë.
