Lufta në Ukrainë nuk pushoi për Krishtlindjet, pavarësisht se presidenti rus Vladimir Putin tha se ishte i hapur për negociata, me forcat e tij që nisën më shumë se 40 sulme me raketa në ditën e Krishtlindjes, tha të hënën ushtria e Ukrainës.
Tre ushtarakë rusë u vranë herët të hënën kur një dron ukrainas u rrëzua teksa sulmoi një bazë në rajonin e Saratovit të Rusisë, njoftuan agjencitë ruse të lajmeve, duke cituar Ministrinë e Mbrojtjes.
Ky ishte sulmi i dytë në bazë këtë muaj. Baza, pranë qytetit të Saratovit, rreth 730 km në juglindje të Moskës dhe qindra kilometra larg vijës së frontit në Ukrainë, u godit më 5 dhjetor nga dronët ukrainas, sipas Moskës, ndërsa një tjetër bazë ajrore në territorin rus.
Siç u njoftua sot, të hënën, Forcat Ajrore Ruse do të ripajisen me raketa të reja hipersonike, sipas agjencisë së lajmeve Interfax, duke cituar një zyrtar ushtarak.
Flota e bombarduesve me rreze të gjatë veprimi të Rusisë është pjesë e treshes së saj bërthamore dhe është e aftë të lëshojë raketa bërthamore dhe konvencionale.
Diku tjetër, Putin përsëri tha të dielën se ishte i hapur për negociata dhe fajësoi Ukrainën dhe aleatët e saj perëndimorë për dështimin për t’u përfshirë në bisedime, një qëndrim që Shtetet e Bashkuara e kishin refuzuar më parë përballë sulmeve të pamëshirshme ruse.
Një këshilltar i presidentit ukrainas Volodymyr Zelensky, megjithatë, tha se Putini duhet të kthehet në realitet dhe të pranojë se ishte Rusia ajo që nuk dëshironte bisedime.
Ndërkohë, sulmet ruse ndaj termocentraleve të Ukrainës kanë lënë miliona pa energji elektrike dhe Zelensky tha se Moska synon t’i bëjë ditët e fundit të vitit 2022 të errëta dhe të vështira.
Ukraina feston tradicionalisht Krishtlindjet më 7 janar, ashtu si Rusia. Megjithatë, këtë vit disa ukrainas ortodoksë vendosën të festojnë më 25 dhjetor dhe zyrtarët ukrainas, përfshirë Zelensky dhe kryeministrin e Ukrainës, bënë urimet e Krishtlindjeve të dielën.
