Në ditën e tretë të Krishtlindjes, pra më 9 janar, në pjesën veriore të Mitrovicës është caktuar protesta e serbëve të pakënaqur me politikën kosovare të presidentit serb Aleksandar Vuçiç, ndërkaq organizatori i saj, Ivan Miletiç, i tha gazetës “Danas” se serbët nga Kosova janë “peng”.
Protesta është caktuar për në orën 12:00 te monumenti i Car Llazarit në qendër të pjesës veriore të Mitrovicës. I pyetur se kush është organizatori i protestës, Miletiçi është përgjigjur “populli i pakënaqur nga veriu i Kosovës”.
Ai thotë se qytetarët e panë me heqjen e barrikadave se në cilin drejtim po shkon situata dhe se janë pajtuar që nuk do të pranojnë “as lojërat e Kurtit e as të Vuçiçit”.
Ai thekson se nuk u janë bashkuar organizatat formale dhe se nuk e dinë se sa njerëz do të vijnë duke pasur parasysh, siç thotë ai, frikën që ekziston te qytetarët.
