Ekzekutimi i Visart Cengut në orët e para të ditës së djeshme në Prizren dhe plagosjes së Rufgan Shehut nga Dibran Hoxhaj, i njohur si “Kobra” ka shkaktuar tronditje jo vetëm në Kosovë, por edhe Shqipëri. Hoxhaj, tashmë i arrestuar është i njohur për shumë krime, por ka arritur që të dalë nga burgu.
Por si? Ehat Miftaraj, drejtor ekzekutiv i Institutit të Kosovës për Drejtësi (IKD), ka komentuar rastin. Miftaraj shprehet se nuk është për t’u çuditur nëse ky rast trajtohet si vetëmbrojtje, dhe “Kobra” të shpëtojë sërish pasi sipas tij, Prokuroria dhe Gjykata në Prizren Hoxhajn e kanë falur 16 herë me dënime amnistuese. Ndaj, ai ka deklaruar se nuk përjashtohet mundësia që edhe kësaj here ta falin.
“Mos u çuditni nëse në fund del se vrasja e fundit në Prizren, del të jetë në ‘vetëmbrojtje’! Nëse Prokuroria dhe Gjykata në Prizren, e kanë fal 16 herë me dënime amnistuese, nuk përjashtohet mundësia që edhe herën e 17-të me ia bë një argat”, ka shkruar Miftaraj në llogarinë e tij në Facebook.
“Është interes publik për ta kuptuar se në 16 aktakuza, cilët janë prokurorët e këtyre rasteve? Në 16 aktakuza dhe shqyrtime gjyqësore sa herë prokurorët kanë informuar gjykatën se kryesi i veprave penale është recidivist?.
Në 16 aktgjykimet dënuese është interes publik me ditë se si është zbatuar politika ndëshkimore? Ndaj 16 aktgjykimeve në sa prej tyre është bërë ankesë nga ana e prokurorit lidhur me dënimin e shqiptuar?” tha ai.
