Dhjetëra ligjvënës demokratë i kanë bërë thirrje administratës së presidentit amerikan, Joe Biden që të bashkëpunojë me autoritetet braziliane në hetimin e protestave të dhunshme në Brasilia dhe t’i heqë vizën amerikane ish-presidentit brazilian, Jair Bolsonaro.
41 kongresmenët dërguan një letër të enjten duke i bërë thirrje qeverisë së SHBA të mbështesë demokracinë dhe sundimin e ligjit në Brazil.
Mbështetësit e Bolsonaros sulmuan Kongresin e Brazilit, Gjykatën Supreme dhe pallatin presidencial të dielën, duke bërë thirrje për një grusht shteti ushtarak për të përmbysur rezultatin e zgjedhjeve të tetorit.
Zyrtarët e Departamentit të Shtetit dhe Shtëpisë së Bardhë nuk iu përgjigjën menjëherë një kërkese për koment mbi letrën.
Departamenti i Shtetit ka deklaruar vazhdimisht se politika e tij nuk është të diskutojë raste specifike të vizave.
Sekretari i Jashtëm, Anthony Blinken tha të mërkurën se Uashingtoni nuk kishte marrë asnjë kërkesë nga Brazili në lidhje me Bolsonaron.
Ish-presidenti i Brazilit tha në rrjetet sociale se do të kthehet në shtëpi më herët se sa ishte planifikuar për arsye mjekësore. Ai ka mohuar se ka nxitur mbështetësit e tij, duke thënë se rebelët “e kapërcyen kufirin”.
Autorët e letrës përfshinin përfaqësuesit Gregory Meeks (ish-kryetar i Komitetit të Punëve të Jashtme të Dhomës së Përfaqësuesve), Joaquin Castro, Ruben Gallego, Chui Garcia dhe Susan Wild.
Presidenti i SHBA Joe Biden dhe liderë të tjerë botërorë kanë dënuar incidentet e dhunshme të së dielës në Brazil.
