Mbrëmjen e së mërkurës disa deputetë të PD-së që janë rreshtuar në krah të kryetarit të grupit, Enkelejd Alibeaj ishin në Pogradec.
Darkën buzë liqenit e organizoi deputeti Lefter Gështenja. Mes të pranishmëve ishin edhe Kreshnik Çollaku, Flutura Açka, Oriola Pampuri, por edhe Bledion Nallbati.
“5pyetjet.al” u interesa duke kontaktuar zotin Nallbati për të mësuar diçka më shumë rreth diskutimeve dhe strategjisë së grupit të Alibeajt që mund të ketë dalë nga darka me peshk dhe verë buzë liqenit.
“Ishim për kokërr të qejfit. Nuk diskutuam për politikë brenda darkës” tha ai për “5pyetjet.al” edhe pse një gjë e tillë është vështirë të besohet.
Por në vetvete trokitja e gotave ishte edhe shenjë triumfi për faktin që Alibeaj arriti që të ruante postin e kryetarit të grupit përballë lëvizjes së Ervin Salianjit që tentoi të merrte drejtimin.
