Kryetari i PD-së, Sali Berisha tha sot se Edi Rama në aferën e ish-zyrtarit të lartë të FBI-së që u arrestua ka shërbyer si agjent influent i Vladimir Putinit. Ai i kërkoi rivalit politik që të pranojë bashkëpunimin me drejtësinë amerikane për të zbardhur dosjen.
“Edi Rama të shndërrohet në “pentito” dhe të kontribuojë në zbardhjen e kësaj afere. Edi Rama është sjellë si agjent i Putinit, sepse përfituesi më i madh nga kjo aferë është Rusia. Unë konstatova se pati reagime nga analistë.
Unë ju kërkoj që të hapin dhe të lexojnë cfarë është agjenti influent? Agjenti influent është personi që ka një status dhe e përdor pozicionin për të influencuar publikun sikur i intereson një fuqie tjetër. Ky është agjenti influent.
Këta janë tre kategori; që ka një status dhe që ka firmosur, këtë nuk di ta them edhe pse ka shumë gjëra të errëta. Kategoria e dytë janë njerëzit që veprojnë me ndërgjegje pa firmë dhe rekrutim.
Kategoria e tretë janë idiotët e dobishëm, spontan, sporadik. A ka deklaratë më të dobishme për Putinin, që mos i bini në qafë Serbisë për sanksionet?” tha Berisha.
