Grupi i Enkelejd Alibeajt brenda PD-së ka zbuluar sot kandidaten për bashkinë e Fierit, e cila është Eriselda Zotaj Çelaj. Në njoftimin e zyrës së shtypit theksohet se Çelaj është propozuar nga strukturat e PD dhe përzgjedhur nga kryesia për të garuar për bashkinë e Fierit.
“Zonja Eriselda Zotaj Çelaj, ka lindur dhe jeton në Fier në një familje demokrate, të nderuar dhe me tradita. Eriselda është e martuar dhe nënë e dy fëmijëve. Zonja Zotaj Çelaj, ka studiuar dhe është diplomuar në Fakultetin e Shkencave Shoqërore, Departamenti Ekonomik, Dega “Kontabilitet-Finance, Titulli Kontabilist”. Ajo ka qenë e angazhuar në jetën publike në Fier, si në aspektin profesional, ashtu dhe atë politik.
Në politikë Eriselda është futur që në moshë të re duke qenë prej vitit 2003 pjesë e Forumit Rinor të PD dhe më pas si anëtare e Lidhjes Demokratike të Gruas, e deri me sot ne pozicionin e Kryetares se Grupseksionit dhe Anëtare e Kryesisë së Degës. Gjatë angazhimit politik ka treguar përkushtim në çdo betejë politike dhe elektorale të Partisë Demokratike.
Eriselda Zotaj Çelaj është mundësia më e mirë për qytetarët e Fierit që të kenë pushtetin në dorën e tyre dhe jo në funksion të vjedhjes e shpërdorimit të taksave tyre” mbyllet njoftimi. E ndërsa 14 Maji po afron, grupi i Alibeajt vijon prezantimin e kandidatëve duke dubluar ata të Sali Berishës që dolën nga primaret. Dy palët po shkojnë me dy kandidatë në zgjedhjet lokale.
