Uashingtoni po përpiqet të “demonizojë Rusinë” dhe të “ushqejë krizën ukrainase” duke akuzuar Moskën për krime kundër njerëzimit, tha të dielën ambasadori rus në SHBA, Anatoly Antonov.
Nënpresidentja e SHBA-së, Kamala Harris, njoftoi të shtunën se Uashingtoni ka përcaktuar zyrtarisht se Rusia po kryen krime kundër njerëzimit në Ukrainë, në një fjalim në Konferencën e Sigurisë në Mynih në Gjermani.
Në një mesazh në rrjetin social Telegram, Antonov tha: “Ne i konsiderojmë insinuata të tilla si një përpjekje, të paprecedentë në aspektin e cinizmit të saj, për të demonizuar Rusinë në rrjedhën e një lufte hibride, të lëshuar kundër nesh. Nuk ka dyshim se qëllimi i sulmeve të tilla është të justifikojë veprimet e Uashingtonit për të nxitur krizën ukrainase”, tha ai.
Harris kishte thënë se Rusia është përgjegjëse për një “sulm të gjerë dhe sistematik” kundër popullsisë civile të Ukrainës, duke kryer krime lufte – siç përfundoi zyrtarisht administrata marsin e kaluar – dhe akte të paligjshme kundër joluftëtarëve. Ajo përmendi prova të vrasjeve të stilit të ekzekutimit, përdhunimeve, torturave dhe dëbimeve me forcë.
Administrata Biden do të vazhdojë të ndihmojë Ukrainën në hetimin e këtyre krimeve të supozuara, tha ajo, duke u zotuar të mbajë “për llogari” autorët dhe “eprorët e tyre”.
