Kreu i Partisë Demokratike, Sali Berisha, teksa mori fjalën për procedurë në seancën e sotme parlamentare, u shpreh se Kuvendi duhet të miratojë ngritjen e Komisionit Hetimor për çështjen “McGonigal”.
“Po lexoni një nen të rregullores dhe po shkelni me dy këmbë një nen themelor të Kushtetutës së Shqipërisë, që detyron Parlamentin të ngrejë komisionet hetimore pasi firmosi ¼-ta e deputetëve të Parlamentit.
Janë një seri çështjesh që duhet të marrin përgjigje nga Komisioni Hetimor Parlamentar. Shqipëria nuk mund të kapërcejë kurrë këtë gjë. Kemi të bëjmë me një nga aktet më të shëmtuara në historinë e marrëdhënieve mes dy vendeve mike partnere.
Kemi të bëjmë me një grup super mafioz që përdori pushtetin e FBI dhe qeverisë për të gjobitur biznesmenë në rrugët dhe klubet e Tiranës, Durrësit e qyteteve të tjera të vendit.”
