Shkarkimi i drejtorit të parkut! Tërhiqet Kumbaro: Do ta rishikojmë vendimin

Agjencia e Zonave të Mbrojtura ka reaguar pas lajmit se drejtori i Parkut Kombëtar Divjakë-Karavasta, Ardian Koçi u pushua nga puna pas një interviste për Zërin e Amerikës lidhur me turizmin natyror në Shqipëri.

Agjencia e Zonave të Mbrojtura shkruan se Koçi kishte shkelur disa herë rregulloren duke mos marrë leje për intervistat që jepte në media. Megjithatë thekson se janë në proces rishikimi të vendimit për shkarkimin e tij.

“Fakt është që, në vijim, Ministria e Turizmit dhe Mjedisit i kërkoi komisionit disiplinor të AKZM-s të rishikojë vendimin dhe masën disiplinore.

Për sa më sipër, kjo çështje është ende në shqyrtim rishikimi përpara se të dilet me një vendim përfundimtar” thotë AZM.

Dje duke folur për Zërin e Amerikës, Koçi tha se shkaku është qesharak, pasi sipas tij, shkelja ishte etike dhe nuk përbën faj administrativ për pushimin nga puna.

Pas gati dhjetë vitesh në detyrë, Ardian Koçi, drejtor i Parkut Divjakë-Karavasta, Parku më i madh Kombëtar në Shqipëri e pa veten në rrugë për një intervistë ku lavdëronte parkun.