Ministri italian i Mbrojtjes, Guido Crosetto pas një takimi kushtuar emigracionit dhe refugjatëve, i thirrur të hënën nga kryeministrja italiane, Giorgia Meloni theksoi ndër të tjera se “fronti i Evropës Jugore po bëhet gjithnjë e më i rrezikshëm”.
Siç thekson gazeta La Stampa, Crosetto tha se BE, NATO dhe Perëndimi nuk e kuptuan që sulmet kibernetike ishin pjesë e konfliktit global të krijuar nga lufta në Ukrainë.
“Tani do të ishte e nevojshme që ata të kuptojnë se fronti i Evropës Jugore po bëhet gjithnjë e më i rrezikshëm,” u shpreh Crosetto.
Ai shtoi se “ata duhet të kuptojnë se imigracioni i pakontrolluar dhe i vazhdueshëm, i cili i shtohet një krize sociale dhe ekonomike, po kthehet në një mënyrë për të dëmtuar vendet më të ekspozuara , duke filluar nga Italia, për zgjedhjet e tyre të qarta gjeostrategjike”.
Nga ana e tij, ministri i Jashtëm italian, Antonio Tajani, nga Jeruzalemi nënvizoi se “emigracioni nuk mund të jetë vetëm një problem italian dhe shtoi: “shumë emigrantë, në këtë fazë, vijnë nga zonat e kontrolluara nga Wagner Group. Nuk do të doja të ishte një përpjekje që synon të inkurajojë kalimin e emigrantëve në Itali”.
