Presidenti i Republikës Bajram Begaj dekretoi sot emërimin e Vlora Hysenit si drejtuese të Shërbimit Informativ të Shtetit. Nuk kishte si të ndodhte ndryshe. Pavarësisht kërkesave nga opozita për transparencë për të kaluarën e Hysenit, Begaj heshti publikisht duke mos dhënë asnjë informacion dhe në fund firmosi dekretin.
Vlora Hyseni ka udhëhequr Agjencinë e Kosovës për Inteligjencë për katër muaj në Kosovë. Ajo ishte në krye të institucionit më të lartë të sigurisë dhe inteligjencës që nga dhjetori i vitit 2020, kur ishte shkarkuar drejtori Kreshnik Gashi, deri në prill të vitit 2021, kur në detyrën e drejtorit u emërua Petrit Ajeti.
Në media njihet si krahu i Hashim Thaçit. Pasi e larguan në Prishtinë, Edi Rama e mori këshilltare. Ajo flet disa gjuhë të huaja. Vlora Hyeni është zyrtarja e radhës nga shqiptarët e Kosovës, që Edi Rama i beson një detyrë mjaft të rëndësishme në Shqipëri.
Ajo do të jetë gruaja e parë në krye të institucionit të Shërbimit Informativ Shtetëror, por mbetet për t’u parë si do të ndikojë në raportet me Kosovën, pasi në Prishtinë u shkarkua nga dy njerëzit që sot janë në pushtet, Vjosa Osmani dhe Albin Kurti.