Kryetari i Partisë së Lirisë, Ilir Meta e kaloi “topin” te kandidatët kur u pyet sot nga gazetarët nëse do të dalë bashkë me Sali Berishën në fushatë, gjë që nuk ka ndodhur deri tani. Ish-Presidenti u shpreh se është në shërbim të kandidatëve, të cilët kanë në dorë takimet dhe fushatën në bazë.
“Ne jemi në shërbim të kandidatëve që janë zgjedhur përmes procesit më historik dhe demokratik prandaj janë më superiorë. Edhe përfaqësuesit në këshillat bashkiakë bëjnë një diferencë si dita me natën.
Kandidatët e zgjedhur nga opozita përfaqësojnë vlerat më të mira të qytetarisë dhe që kanë vizionin më qartë. Janë kandidatë të përkushtuar në rrugën euro-atlantike të Shqipërisë, ndaj edhe do të fitojmë” tha ai.
