Në Veriun e Kosovës janë organizuar zgjedhje lokale të cilat u karakterizuan me pjesëmarrje të ulët të votuesve.
Bazuar në të dhënat e Komisionit Qendror të Zgjedhjeve (KQZ), deri në orën 15:00 numri i votuesve ka qenë 2.4 për qind.
Në ora 19:00 vendvotimet do të mbyllen, për t’u shpallur më pas rezultatet pas numërimit të votave.
Lista Serbe që dirigjohet nga Beogradi ka bojkotuar zgjedhjet duke iu bërë thirrje serbëve lokalë që të mos marrin pjesë në votimet e 23 prillit.
Ndërkaq anëtari i Komisionit Qendror të Zgjedhjeve nga Lëvizja Vetëvendosje, Sami Kurteshi, ka deklaruar se ka pasur kërcënime ndaj serbëve për të mos votuar.
Qeveria e Kosovës vazhdimisht ka deklaruar se serbët në Veri janë të kërcënuar nga bandat kriminale.
Këto zgjedhje ishin paraparë që të mbahen dhjetorin e vitit të kaluar, por ishin shtyrë për shkak të tensioneve të larta në Veriun e Kosovës.
Që nga atëherë Beogradi vazhdimisht ka kundërshtuar mbajtjen e zgjedhjeve, duke kërkuar bojkot.
