Kryeministrja e Serbisë, Ana Bërnabiç ka komentuar zgjedhjet që po mbahen në katër komunat veriore në Kosovë.
Në një postim në profilin e saj në Twitter ajo është shprehur shumë e pakënaqur me mbajtjen e zgjedhjeve, duke sulmuar fuqitë botërore që përkrahën mbajtjen e tyre.
“Mbajeni mend këtë ditë. Kjo është dita kur geto e fundit evropiane legalizohet dhe legjitimohet. Këto janë fotot që me të vërtetë përshkruajnë “sundimin e ligjit” dhe kuptimin e vërtetë të “zgjedhjeve demokratike” në Kosovë dhe Metohi të mbështetura nga BE-ja dhe Kuinti.”, shkroi ajo.
Ajo gjithashtu ka hedhur kritika për mbikëqyrjen e procesit nga policia.
“Zgjedhjet – të lira dhe të ndershme, me forca të armatosura dhe mjete të blinduara! Kjo është Evropa, në shekullin e 21-të.”, shtoi ajo.
Kryeministrja serbe në postimin e saj ka etiketuar Ambasadën Amerikane, Bashkimin Europian e OSBE-në, duke u shprehur e mllefosur për mbështetjen që i dhanë Republikës së Kosovës për mbajtjen e zgjedhjeve.
