Përfaqësuesi I BE-së për dialogun Kosovë-Serbi, Miroslav Lajçak një ditë para takimit që do të zhvillohet nesër në Bruksel mes kryenegociatorëve Besnik Bislimi dhe Petar Petkoviç ka bërë një postim në rrjetin e tij sociale, Facebook.
Lajçak ka shkruar se në vizitën e tij në Kosovë dhe Serbi ka përgatitur terrenin për raundin tjetër të takimit të kryenegociatorëve, Besnik Bislimi dhe Petar Petkoviç në Bruksel.
Ai tha se gjatë javës që shkoi ndalesa e tij e parë ishte në Prishtinë, ku u takua me kryeministrin e Kosovës Albin Kurti dhe zëvendëskryeministrin e parë Besnik Bislimi.
“Fatkeqësisht, ajo që dëgjova më shqetësoi. Prandaj, ritheksova nevojën për të shmangur çdo mundësi përshkallëzimi dhe përqendrim të plotë në normalizimin”, ka thënë Lajçak.
Ndërmjetësi në dialog, ka thënë se vizita e tij vazhdoi në Beograd, ku u takua me presidentin serb Aleksandar Vuçiq dhe drejtorin e Zyrës për Kosovën, Petar Petkoviç.
“Gjatë takimit tonë, ne diskutuam rrugën përpara për zbatimin e Marrëveshjes së 27 shkurtit dhe aneksit të saj të 18 marsit për t’u përgatitur për takimin në Bruksel që do të zhvillohet nesër. Pres që të dy kryenegociatorët të jenë të gatshëm të bien dakord për hapat eardshëm konkretë drejt zbatimit të Marrëveshjes”, ka shkruar Lajçak.
Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi sot ka udhëtuar drejt Brukselit, ku të hënën në Bruksel pritet të zhvillohen takimet e radhës në nivelin e kryenegociatorëve në procesin e dialogut, i cili do të ketë në fokus zbatimin e Marrëveshjes Bazë dhe Aneksit të Zbatimit.
