Në Durrës procesi zgjedhor po vijon me disa problematika. Përveç grumbullimeve jashtë Qendrave të Votimit dhe problemeve me pajisjet e identifikimit elektronik, në brendësi të tyre është vënë re dhe prania e personave që nuk duhet të qëndronin.
Një prej tyre është Hekuran Markola, kandidat i PS për këshillin Bashkiak i cili nuk largohet nga Qendra e Votimit, duke thyer kështu ligjin, pasi prania e kandidatëve nuk është e lejuar.
Procesi i votimit ka nisur dhe në zonën e Spitallës në Durrës, por një situatë jo normale duket jashtë ambienteve të Qendrës së Votimit. Në këtë qendër votimi duket qartësisht shkelja e rregullave pasi ka grumbuj njerëzish e automjetesh para Qendrës së Votimit.
Ndërkohë, në shkollën “Neim Babameto” në Durrës, ku është e vendosur një Qendër Votimi nuk ka nisur ende procesi i votimit. Nuk ka ende votim në ambientet e kësaj shkolle ku janë vendosur njerëz të shumtë që kanë bllokuar procesin e votimit.
