FSHF shpëton Tiranën nga përjashtimi. Komisioni i Disiplinës ka çelur hetimin disiplinor për aktet e ndodhura në ndeshjen e javës së 35-të të “Abissnet Superiore” midis KF Tirana dhe KF Bylis. Fillimisht është marrë masa e përkohshme e zhvillimit të ndeshjeve të KF Tirana pa spektator për një afat 90 ditor. Gjithashtu janë dënuar nëntë lojtarë dhe zyrtarë të ekipit të futbollit të Tiranës.
Tirana dhe Bylis barazuan dje 2-2 për javën e 35-të dhe të parafundit në Superligë. Bardhebluve me këtë rezultat u iku vendi i parë duke rrezikuar titullin seriozisht. Kjo nxiti zemërim te tifozët që ishin të pranishëm në stadiumin “Arena Egnatia” në Rrogozhinë që u sulën në fushë pas fërshëllimës së kryesorit Kridens Meta. Tifozët bardheblu u futën në fushë dhe dhunuan arbitrat e ndeshjes.
