Tenisti serb, Novak Djokovic ka folur për mediat ndërkombëtare pas deklaratës nacionaliste që bëri një ditë më parë, ku pas ndeshjes në Roland Garros iu drejtua kamerës, duke shkruar: “Kosova është zemra e Serbisë! Ndaleni dhunën”.
“Kjo është më e pakta që mund të bëj. Kam detyrimin si figurë publike të jap mbështetjen time. Si djalë i një babai të lindur në Kosovë, ndjej nevojën për të dhënë mbështetjen time për Serbinë.
Nuk e di se çfarë do të sjellë e ardhmja për popullin e Kosovës dhe të Serbisë, por në situata të tilla duhet të tregosh unitet”, tha Djokovic.
Megjithatë, tenisti serb u shpreh se është kundër dhunës dhe se çështjet duhet të zgjidhen në mënyrë paqësore.
“Më vjen shumë keq për situatën aktuale në Kosovë. Ajo është zemra e Serbisë dhe qendra e shumë ngjarjeve të rëndësishme të vendit tonë.
Beteja të mëdha kanë ndodhur atje, si dhe tempujt dhe manastiret janë të vendosura në këtë territor”, përfundoi tenisti.
