Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi ka zhvilluar ditën e sotme një takim me shefen e Zyrës Ndërlidhëse greke në Kosovë, Heleni Vakali.
Për mes një njoftimi zyrtar mësohet se në takim u bisedua mbi zhvillimet në veri të Mitrovicës dhe progresin që Kosova e ka bërë në proceset e integrimit evropian dhe zhvillimin e vendit.
Bislimi i kërkoi Zyrës Ndërlidhëse greke dënimin e sulmeve të bandave kriminale në veri.
“Mbi zhvillimet e fundit dhe situatën në veri të vendit, zëvendëskryeministri Bislimi theksoi nevojën dhe domosdoshmërinë për dënimin ashpërsisht të sulmeve të bandave kriminale të dirigjuara e orkestruara nga Beogradi ndaj qytetarëve, KFOR-it, Policisë së Kosovës e gazetarëve”, thuhet në njoftim.
