Zëdhënësi i Qeverisë së Kosovës, Përparim Kryeziu ka reaguar në lidhje me dorëzimin e draft-statutit të kryeministrit, Edi Rama për të zgjidhur situatën në veri të vendit.
Sipas Kyeziut ata presin mbështetje nga Shqipëria sa i përket dialogut pasi ndërmjetësues kanë shumë.
“Nga Shqipëria zyrtare presim mbështetje. Ndërmjetësues kemi shumë”, ka thënë Kryeziu për RTV Dukagjinin.
Kryeziu ka shtuar se çështja e katër kryetarëve në veri – – është çështje e kushtetutës dhe sundimit të ligjit.
“Çështja e kryetarëve të katër komunave në veri të vendit është çështje e respektimit të kushtetutës, sundimit të ligjit dhe ofrimit të shërbimeve ndaj qytetarëve tanë, që për shkak të bojkotit të diktuar nga Serbia u kishin munguar për plot 6 muaj”, ka thënë ai.
“Çështje e funksionalitetit të shtetit të Kosovës, dhe kjo u dëshmua me draftin e prezantuar nga Ekipi Menaxhues që drejtohej nga deputetja e Vuçiçit e cila synonte një Republika Srbska në Kosovë dhe së fundmi me Non-paperin e Akademisë së Shkencave dhe e Artit e Serbisë që flet për ‘Botën Serbe’. Në të dy rastet në pyetje është Kosova. Në të dy rastet rreziku është Serbia”, ka shtuar ai.
Rama ka dorëzuar një draft-statut të Asociacionit presidentit francez, Emmanuel Macron dhe kancelarit gjerman, Olaf Scholz të cilët i cilësoi si “kumbarë” të planit franko-gjerman.
