Kuvendi i Shqipërisë është mbledhur këtë të enjte në seancë plenare, ndërsa fjalën i pari e ka marrë Sali Berisha, i cili në nisje kërkoi që të futej në rend të ditës ndërhyrja e policisë në kampin e muxhahedinëve në Manzë të Durrësit.
Ai dënoi vrasjen e njërit prej muxhahedinëve, ndërsa kërkoi edhe dorëheqjen e ministrit të Brendshëm dhe mbajtjen e një minute heshtje në nder të tij.
“Jam këtu për të dënuar me ashpërsinë më të madhe dhe futjen në rendin e ditës të masakrës që u krye në kampin e muxhahedinëve.
Në këtë moment ndihem më shumë se kurrë një muxhahedin dhe dua t’ju shpreh atyre ndjenjat e mia më të sinqerta të simpatisë.
Ndihem sot më muxhahedin se kurrë sepse qeveria amorale e këtij vendi vrau në bukë të vet, në strehë të vet një luftëtar lirie.
Kërkoj largimin e menjëhershëm të ministrit të Brendshëm dhe të mbajmë një minutë heshtje për martirin e lirisë që u vra në bukë të vet.”, u shpreh ndër të tjera në fjalën e tij Berisha.
