Tregtari rus i armëve, i cili u shkëmbye me yllin e basketbollit amerikan, Brittney Griner në një shkëmbim mes SHBA-së dhe Rusisë, është zgjedhur si kandidat i partisë së ekstremit të djathtë për një vend në parlamentin rajonal në Rusi.
Viktor Bout, i njohur si “tregtari i vdekjes”, kaloi 14 vjet në një burg amerikan për tregti të paligjshme armësh përpara se të lirohej në shkëmbim me Griner në dhjetor.
Ai u bashkua publikisht me partinë politike të ekstremit të djathtë pro-Kremlin, Partia Liberale Demokratike e Rusisë (LDPR) menjëherë pas lirimit të tij.
Agjencia ruse e lajmeve RIA ka raportuar se Bout është emëruar si kandidat për asamblenë legjislative të rajonit Ulyanovsk në Rusinë qendrore, duke cituar një zyrtar të partisë. LDPR ka pikëpamje ultra-nacionaliste dhe ka mbështetur vazhdimisht pushtimin e Ukrainës nga Vladimir Putin.
