Kremlini është shprehur ditën e sotme se presidenti rus, Vladimir Putin është takuar me kreun e grupit mercenar Wagner, Yevgeny Prigozhin më 29 qershor, pesë ditë pasi luftëtarët e tij u rebeluan.
Zëdhënësi i Kremlinit, Dmitry Peskov tha se Putin ftoi 35 persona në takim, duke përfshirë komandantët e njësive, dhe se ai zgjati tre orë.
Komandantët e Wagner i thanë Putinit se ata ishin ushtarët e tij dhe do të vazhdonin të luftonin për të.
Kryengritja e shkurtër nën Prigozhin, në të cilën luftëtarët e Wagner morën kontrollin e qytetit jugor të Rostovit, i paraqiti Putinit sfidën e tij më serioze që nga marrja e pushtetit në Rusi.
Rebelimi i tyre përfundoi me një marrëveshje të ndërmjetësuar nga presidenti bjellorus Alexander Lukashenko.
Putin që atëherë ka falënderuar forcat e tij ushtarake dhe të sigurisë për shmangien e kaosit dhe luftës civile.
