Zgjedhjet e parakohshme për zëvendësimin e kryebashkiakut të shkarkuar të Kukësit, Safet Gjici, rrezikojnë të mos mbahen brenda afteve ligjore, pasi institucionet përgjegjëse i pasojnë fajin njëri-tjetrit për praktika shkresore.
Gjici u rizgjodh më 14 maj, por dha dorëheqjen më 16 qershor dhe po atë ditë u shkarkua nga Këshilli i Ministrave, pasi në internet qarkulloi një video e tij duke kryer marrëdhënie seksuale me një grua në zyrë dhe u arrestua pak ditë më vonë për “korrupsion pasiv”.
Vendimi për shkarkimin e tij kishte fuqi të menjëhershme, edhe pse u botua në Fletoren Zyrtare të datës 26 qershor.
Kodi Zgjedhor parashikon që zgjedhjet duhet të mbahen brenda 45 ditëve, por Presidenti nuk ka shpallur ende një datë, edhe pse ka kaluar një muaj nga shkakimi i tij.
Institucioni i Presidentit të Republikës i tha BIRN të mërkurën se ishte në pritje të njoftimit të vakancës nga Këshilli i Ministrave.
“Sapo të mbërrijë vakanca në Presidencë zyrtarisht,” u përgjigj një zëdhënëse e Presidencës.
Ajo pretendoi se nuk mjaftonte njoftimi publik dhe as ai në Fletore Zyrtare, por duhej të vihej në dijeni institucioni edhe shkresërisht. Presidenca kërkoi kohë për një përgjigje kur u pyet se në cilat dispozita ligjore bazohej kjo praktikë.
Ndërkohë, Kryeministria pretendon se e ka kryer detyrën e saj me publikimin e vendimit.
